యూపిలోని ప్రయాగ్ రాజ్ లో మహా కుంభమేళలోని సెక్టార్ 19లో అగ్నిప్రమాదం చోటుచేసుకుంది. భక్తుల కోసం ఇక్కడ ఏర్పాటు చేసిన గుడారాల్లో రెండు వంటగ్యాస్ సిలెండర్లు ప్రమాదవశాత్తు పేలడంతో ఈ ప్రమాదం జరిగింది. ఒక్కసారిగా మంటలు వ్యాపించడంతో గుడారాల్లోని భక్తులు భయంతో పరుగులు తీశారు. దాదాపు ముప్పైకి పైగా గుడారాలు ఈ మంటల్లో ఆహుతయ్యాయి. అగ్నిమాపక సిబ్బంది ఫైరింజన్లతో ఘటనా స్థలానికి వచ్చి మంటలను అదుపు చేస్తున్నారు. రోజుకు సుమారు ఇరవై లక్షలమంది ఈ మహాకుంభమేళాకు వచ్చి పుణ్యస్నానాలు ఆచరిస్తున్నారు. జనవరి 19వ తేదీ నాటికే దాదాపు ఏడు కోట్ల మంది పుణ్యస్నానాలు ఆచరించారు. దేశ వ్యాప్తంగా మొత్తం నలబై కోట్ల మందికి పైగా భక్తులు మహా కుంభమేళా కు వస్తారని ప్రభుత్వం అంచనా వేస్తోంది. భక్తుల కోసం ప్రయాగ్ రాజ్ లో అన్ని ఏర్పాట్లు చేశారు. ఎన్డీఆర్ఎస్ బృందాలు, ఫైర్ ఫైటింగ్ టీంలతో పాటు క్విక్ రెస్పాన్స్ బృందాలను కూడా ప్రభుత్వం ఇక్కడ  మోహరించింది. కోట్ల మంది భక్తులు త్రివేణి సంగమం వద్దకు వచ్చి పుణ్య స్నానాలు ఆచరించే క్రమంలో ఎక్కడా ఇబ్బందులు తలెత్తకుండా ముందు జాగ్రత్తలు తీసుకుంది. అయినప్పటికీ ఈ గ్యాస్ సిలెండర్ల పేలుడు జరగడంతో అధికార యంత్రాంగం అప్రమత్తమైంది.