ఆ ఐపీఎస్‌లకు కానిస్టేబుళ్ల డ్యూటీ.. ఏపీ ప్రభుత్వం ర్యాగింగ్‌ తాము ప్రతిపక్షంలో ఉన్నప్పుడు ఇబ్బంది పెట్టిన అధికారులను అధికారంలోకి వచ్చాక ఒక చూపు చూడడం ఏ పార్టీ అయినా చేసే పనే. కానీ ఆ విషయంలో ఇప్పుడు టీడీపీ కొత్త పాఠాలు నేర్పుతోంది. ఇప్పటికే చాలామంది ఐఏఎస్‌లు, ఐపీఎస్‌లకు పోస్టింగ్‌లు ఇవ్వకుండా పూర్తిగా పక్కన పెట్టేసింది. వాళ్లకి ఆ ట్రీట్‌మెంట్‌ సరిపోదని భావించిందేమో. ఏకంగా కానిస్టేబుళ్లకు డ్యూటీలు వేసినట్లు డ్యూటీలు వేసి కసి తీర్చుకుంది. సీనియర్‌ ఐపీఎస్‌ అధికారులు సీతారామాంజనేయులు, కొల్లి రఘురామిరెడ్డి, సునీల్‌కుమార్, సంజయ్, క్రాంతిరాణా టాటా, విశాల్‌ గున్నీ తదితర 16 మంది ఐపీఎస్‌ అధికారులను అవమానించేలా ప్రతిరోజూ డీజీపీ కార్యాలయానికి వచ్చి ఉదయం 10 నుంచి సాయంత్రం 5 గంటల వరకు ఉండాలని డీజీపీ ప్రత్యేకంగా ఉత్తర్వులిచ్చారు. డీజీపీ ఆఫీసుకు వచ్చినప్పుడు, వెళ్లేటప్పుడు సంతకాలు పెట్టాలని సాక్షాత్తూ ఆదేశించారు. సీతారామాంజనేయులు ఇంటిలిజెన్స్‌ డీజీగా పని చేశారు. ఈ పోస్టు అనధికారికంగా డీజీపీ కంటె ప్రాధాన్యమైందనే చెప్పాలి. అలాంటి అధికారిని ఆఫీసుకు వచ్చి ఉదయం, సాయంత్రం సంతకం పెట్టాలని ఏకంగా పేరు పెట్టి ఉత్తర్వులివ్వడంపై విస్మయం వ్యక్తమవుతోంది. ఆల్‌ ఇండియా సర్వీసు అధికారులను ఇలా కానిస్టేబుల్‌ స్థాయికి దిగజార్చి ఇబ్బంది పెట్టడమే బహుశా ఎక్కడా జరిగి ఉండదు.