కింద ఇచ్చిన సలహాలను పాటిస్తే మతిమరుపు అదుపులో ఉంటుంది.

1. ప్రతిరోజూ ఏదో ఒక వ్యాయామం చెయ్యడం.

2. మెదడును యాక్టివ్ గా ఉంచుకోవడం. అంటే మెదడుకు మేత పెట్టే ప్రహేళికలు (పజిల్స్), పదవినోదం, సుడోకు లాంటివి రోజూ సాధన చేస్తూ ఉండటం.

3. మెమరీకి సంబంధించిన ఆటలు ఏదైనా ఆడుతూ ఉండటం. ఉదాహరణకు ఎవరినైనా కొన్ని వస్తువులు ఒక గదిలో పెట్టమని, వాటిని మీరు ఒక నిమిషం పాటు చూసి బయటకు వచ్చి, ఏమేం చూసి వచ్చారో అన్నీ గుర్తు చేసుకుని చెప్పడం, రాయడం. ఇది పిల్లల్లో కూడా జ్ఞాపకశక్తిని పెంపొందించడానికి ఆడించవచ్చు. ఇది మా చిన్నప్పుడు మా ఉపాధ్యాయులు అప్పుడప్పుడూ ఆడించేవారు. ఇంటర్నెట్ లో వెతికితే మరిన్ని ఆటలు దొరకవచ్చు. కానీ శ్రద్ధగా సాధన చేయడం ముఖ్యం.

4. ఆరోగ్యకరమైన ఆహారం తీసుకోవడం అన్నింటికీ మంచిది.

5. నలుగురితో ఉల్లాసంగా గడపడం. ఇందువల్ల నిద్రాణమైన జ్ఞాపకాలు బయటికి వచ్చి జ్ఞాపకశక్తి మెరుగుపడే అవకాశాలు ఉన్నాయి.

6. ఇంట్లో మీరు వాడే వస్తువులను క్రమపద్ధతిలో ఉంచుకోవడం వల్ల, ఏది ఎక్కడ ఉంటుందో సులభంగా గుర్తుంటుంది. ఉదాహరణకు మీ కళ్ళజోడు ఎప్పుడూ బెడ్ పక్కనే చిన్న టేబుల్ మీద ఉంచే అలవాటు చేసుకోవచ్చు. ఎప్పుడైనా కనబడనప్పుడు నేరుగా అక్కడికే వెళ్ళి వెతకచ్చు, ఇంట్లోవాళ్ళెవరైనా ఆ చోటు మార్చేస్తే తప్ప.

7. మంచి నిద్ర కేవలం మతిమరుపు నివారించడానికే కాదు, పూర్తి ఆరోగ్యానికి అవసరం. మంచి నిద్రలో మెదడు సమాచారాన్ని జాగ్రత్తగా భద్రపరుస్తుంది. మరిచిపోయే అవకాశాలు తక్కువ ఉంటాయి.