డీప్‌ ఫేక్‌ వీడియోల కట్టడిపై చర్చించేందుకు కేంద్రం గురువారం కీలక సమావేశం నిర్వహించింది. సోషల్‌ మీడియా సంస్థలు, నాస్కామ్, కృత్రిమ మేధ (ఆర్టిఫిషియల్‌ ఇంటెలిజెన్స్‌) పై పనిచేసే నిపుణులతో చర్చించింది. ఈ సమావేశం అనంతరం కేంద్ర ఐటీ మంత్రి అశ్వినీ వైష్ణవ్‌ మీడియాతూ వివరాలు వెల్లడించారు. ఆధునిక సాంకేతిక పరిజ్ఞానాన్ని దుర్వినియోగం చేస్తూ డీప్‌ ఫేక్‌ రూపంలో మన ప్రజాస్వామ్యానికి సరికొత్త ముప్పు తీసుకొస్తున్నారని ఆందోళన వ్యక్తం చేశారు. దీనిని కట్టడి చేసేందుకు తక్షణమే చర్యలు తీసుకోవాల్సిన అవసరం ఉందని తెలిపారు. 

దీనిపై సోషల్‌ మీడియా సంస్థలతో జరిగిన సమావేశంలో తాము నాలుగు అంశాలపై కీలకంగా చర్చించామని మంత్రి వివరించారు. డీప్‌ ఫేక్‌ లను గుర్తించడం, వాటి వ్యాప్తిని అరికట్టడం, వాటిని నివేదించడం, అవగాహన కల్పించడం వంటి అంశాలపై చర్చలు జరిపామని తెలిపారు. రాబోయే కొన్ని వారాల్లో దీనికి సంబంధించి కొత్త నిబంధనలు తీసుకురాబోతున్నామని చెప్పారు. ఆ ముసాయిదా రూపకల్పనను నేటి నుంచే ప్రారంభిస్తామన్నారు. ఇప్పటికే అమల్లో ఉన్న నిబంధనలను సవరించడమో.. లేకపోతే కొత్త చట్టం తీసుకురావడమో చేస్తామని కేంద్రమంత్రి వెల్లడించారు. డిసెంబరు తొలి వారంలో దీనిపై మరోసారి చర్చిస్తామన్నారు.

ఇటీవల సినీతారలు రష్మిక, కాజోల్, కత్రినా కైఫ్, సచిన్‌ కుమార్తె సారా సహా పలువురు సెలబ్రిటీల డీప్‌ ఫేక్‌ వీడియోలు వైరల్‌ అయిన విషయం తెలిసిందే. దీంతో టెక్నాలజీ దుర్వినియోగంపై పలువురు ప్రముఖులు ఆందోళన వ్యక్తం చేస్తున్నారు. అటు ప్రధాని మోదీ కూడా దీనిపై తీవ్రంగా స్పందించారు. డీప్‌ ఫేక్‌లు సమస్యాత్మకంగా మారుతున్నాయని తెలిపారు. దీనిపై ప్రజలకు అవగాహన కల్పించాలని మీడియాను కోరారు. ఈ నేపథ్యంలోనే చర్యలకు సిద్ధమైన కేంద్రం గురువారం సోషల్‌ మీడియా సంస్థలతో సమావేశమైంది.